ԿԲ խորհրդի նիստում

Կենտրոնական բանկի խորհուրդը հունվարի 22-ի նիստում, որը վարում էր ԿԲ նախագահ Արթուր Ջավադյանը, հաստատել է «Պարտադիր կուտակային կենսաթոշակային բաղադրիչի մասնակիցների ռեեստրը վարողի՝ կենտրոնական բանկ ներկայացվող հաշվետվությունները, դրանց ներկայացման կարգը, բովանդակությունը և պարբերականությունը» կանոնակարգ 5/08-ը, լրացումներ և փոփոխություններ կատարել «Հայաստանի Հանրապետության տարածքում գործող բանկերի ցուցանիշների ամփոփ գնահատականի (ՔԱՄԵԼՍ) հաշվարկման, հաստատման և հրապարակման կարգում» և «Հայաստանի Հանրապետության տարածքում գործող ապահովագրական ընկերությունների գործունեության ցուցանիշների ամփոփ գնահատականի (ՔԱՌԱՄԵԼՍ) հաշվարկման մեթոդաբանությունը» կանոնակարգ 3/08-ում:

Խորհուրդը հավանություն է տվել «Հայաստանի Հանրապետության կենտրոնական բանկի դրամավարկային քաղաքականության անուղղակի գործիքներ և դրանց կիրառման մեխանիզմներ» փաստաթղթին և «Հայաստանի Հանրապետության կենտրոնական բանկի հետ ռեպո գործարքների կնքման համար պարտատոմսերի սկզբնական մարժայի և շեմի հաշվարկման և հրապարակման» կարգին, ինչպես նաև հաստատել ««Ռեպո/հակադարձ ռեպո» համակարգի կանոնները»:

Հաստատվել են 2012-2013 թթ. հուշադրամների թողարկման ծրագրով նախատեսված «Հայկական այբուբենի տառերը» շարքի տասնմեկ հուշադրամների դիմերեսի և դարձերեսի էսքիզները:

ԿԲ խորհուրդը գրանցել է ««Ավտոտրասնպորտային միջոցների օգտագործումից բխող պատասխանատվության պարտադիր ապահովագրության մասին» Հայաստանի Հանրապետության օրենքի 12-րդ հոդվածի 5-րդ մասով նախատեսված առողջությանը պատճառված վնասների և Հայաստանի Հանրապետության տարածքից դուրս գտնվող բժշկական հաստատությունների ցանկ» RL 1-024 հին կանոնների գործողության դադարեցումը և հաստատել «2013 թ-ի համար «Ավտոտրասնպորտային միջոցների օգտագործումից բխող պատասխանատվության պարտադիր ապահովագրության մասին» Հայաստանի Հանրապետության օրենքի 12-րդ հոդվածի 5-րդ մասով նախատեսված առողջությանը պատճառված վնասների և Հայաստանի Հանրապետության տարածքից դուրս գտնվող բժշկական հաստատությունների ցանկ» RL 1-024 կանոնները:

Խորհուրդը վերաձևակերպել է «Կարտուշ-Արտ» ՍՊԸ, «ԷՆՋԻԷՍ ՖԻՆԱՆՍ» ՍՊԸ, «Թրեյդեր» ՍՊԸ գրավատան կազմակերպման, անհատ ձեռնարկատեր Արսեն Պապյան փոխանակման կետի արտարժույթի առուվաճառքի թիվ 126 լիցենզիաները: Ուժը կորցրած են ճանաչվել «ԳՐԱՎԱԳԱՐՏ» ՍՊԸ գրավատան կազմակերպման թիվ ԳԳ-Ե 262 և Լենա Դավթյան փոխանակման կետին տրամադրված արտարժույթի առուվաճառքի գործառնությունների իրականացման թիվ 676 լիցենզիաները: «Կոնվերս Բանկ» ՓԲԸ-ին տրամադրվել է «Յունիստրիմ» արտասահմանյան վճարահաշվարկային համակարգում մասնակցության թույլտվություն: