Իրանն ուժեղացնում է պաշտպանությունը ռուսական «Տիրադա-2Ս» էլեկտրոնային պայքարի համակարգերով

Իրանը հնարավոր ամերիկյան հարվածներից պաշտպանվելու համար օգտագործում է ռուսական «Տիրադա-2Ս» ռադիոէլեկտրոնային պայքարի համակարգեր։ Այդ մասին հայտնում է «Военная хроника» Telegram-ալիքը՝ նշելով, որ այս համալիրները նախատեսված են հակառակորդի կապի և արբանյակային համակարգերի աշխատանքը խափանելու համար։

Ըստ հրապարակման՝ «Տիրադա-2Ս»-ը կարող է խափանել ժամանակակից արբանյակային կապի համակարգերի ազդանշանները, այդ թվում՝ Ka և Ku տիրույթներում գործող կապը, ինչպես նաև ազդել Starlink ցանցի վրա։ Նման տեխնոլոգիաները կիրառվում են հակառակորդի հաղորդակցական հնարավորությունները սահմանափակելու նպատակով։

Ավելի վաղ հաղորդվել էր, որ 2018 թվականին Ռուսաստանում անցկացվել են այս համալիրի փորձարկումները, որոնք հաստատել են դրա արդյունավետությունը կապի արբանյակների աշխատանքը խափանելու գործում։ Ռազմարդյունաբերական աղբյուրների գնահատմամբ՝ «Տիրադա-2Ս»-ը դասվում է ռուսական այն սպառազինությունների շարքին, որոնք մի շարք ցուցանիշներով մրցունակ են արևմտյան անալոգների հետ։