ՌԴ վարչապետ Մեդվեդևն առաջին անգամ շփվել է Իվանիշվիլիի հետ

Ռուսաստանի դաշնության վարչապետ Դմիտրի Մեդվեդևը չորեքշաբթի օրը Դավոսի տնտեսական ֆորումի հյուրերի պատվին կազմակերպած ընդունելության ժամանակ զրուցել է Վրաստանի վարչապետ Բիձինա Իվանիշվիլիի հետ: Այս մասին Риа Новости-ին տեղեկացրել է միջոցառմանը ներկա ռուս գործարարներից մեկը:

Սա առաջին շփումն էր երկու երկրների կառավարության ղեկավարների միջև, որոնք Թբիլիսիի նախաձեռնությամբ խզել էին դիվանագիտական հարաբերությունները 2008թ. օգոստոսին տեղի ունեցած ռուս-վրացական պատերազմի արդյուքնում:

Ինչպես գործակալությանը հաղորդում է վերոնշյալ գործարարը, Վրաստանի վարչապետն ինքն է մոտեցել Դմիտրի Մեդվեդևին, և նրանք ինչ-որ հարցի շուրջ զրուցել են մի քանի րոպե:

Մեդվեդևի մամլո ծառայությունից մեկնաբանել են այդ տեղեկությունը, հայտարարելով, որ նմանատիպ մեծամասշտաբ ֆորումների ժամանակ ավանդաբար բազմատեսակ շփումներ են տեղի ունենում տարբեր երկրների ներկայացուցիչների միջև: