Իրանը հրթիռային հարված է հասցրել Քուվեյթում տեղակայված ԱՄՆ ռազմաբազային

Իրանը հրթիռային հարված է հասցրել Քուվեյթում գտնվող ԱՄՆ «Ալի ալ-Սալեմ» ռազմաբազային, ինչպես նաև Հնդկական օվկիանոսի հյուսիսային հատվածում տեղակայված ամերիկյան նավերին։ Այս մասին հայտնում է РИА Новости-ն՝ հղում անելով իրանական Fars գործակալությանը։

Իրանի բանակի հայտարարության համաձայն՝ ցամաքային և ռազմածովային ուժերի հրթիռային ստորաբաժանումները երկրի տարբեր շրջաններից արձակել են 15 թևավոր հրթիռ՝ թիրախավորելով «Ալի ալ-Սալեմ» ռազմաբազան և «հակառակորդի նավերը» Հնդկական օվկիանոսի հյուսիսային հատվածում։

Ավելի վաղ The New York Times-ը հաղորդել էր, որ Իրանը հարվածներ է հասցրել Մերձավոր Արևելքում գտնվող առնվազն վեց ամերիկյան ռազմական օբյեկտների՝ այդ թվում Բահրեյնի Մանամայում տեղակայված ԱՄՆ Հինգերորդ նավատորմի շտաբին, ինչպես նաև Իրաքի և Քուվեյթի ռազմաբազաներին ու Դուբայի նավահանգստին։ Մարտի 2-ի առավոտյան Իրանը սկսել է նոր հարվածների շարք ԱՄՆ ռազմաբազաների դեմ Քաթարում, Քուվեյթում, Բահրեյնում և Արաբական Միացյալ Էմիրություններում։