Իրանի գաղտնի զինանոցը․ ինչ զենքերով է Թեհրանը հակահարված տալիս ԱՄՆ-ին և Իսրայելին

Իրանի և ԱՄՆ–Իսրայել հակամարտության սրման ֆոնին Թեհրանի ռազմական պատասխանն հիմնականում հիմնվում է նրա հրթիռային և անօդաչու համակարգերի վրա։ Վերլուծաբանների գնահատմամբ՝ Իրանը ունի Մերձավոր Արևելքում ամենամեծ և բազմազան հրթիռային զինանոցներից մեկը, որը ներառում է բալիստիկ և թևավոր հրթիռներ։ Երկար հեռահարության իրանական բալիստիկ հրթիռները կարող են անցնել մոտավորապես 2000-2500 կիլոմետր ճանապարհ, ինչը հնարավորություն է տալիս թիրախավորել Իսրայելն ու Պարսից ծոցի տարածաշրջանում տեղակայված ԱՄՆ ռազմաբազաները։

Իրանի զինանոցում կարևոր դեր ունեն նաև կարճ և միջին հեռահարության բալիստիկ հրթիռները, ինչպիսիք են Fateh, Zolfaghar, Qiam-1, Shahab-3, Emad և Sejjil համակարգերը։ Այս հրթիռները նախատեսված են արագ և զանգվածային հարվածների համար՝ կարճ ժամանակում ճնշելու հակառակորդի հակաօդային պաշտպանությունը։ Բացի այդ, Իրանը օգտագործում է թևավոր հրթիռներ՝ Soumar, Hoveyzeh, Quds և Ya-Ali, որոնք թռչում են ցածր բարձրությամբ և դժվար են հայտնաբերվում ռադարներով։

Թեհրանի ռազմական ռազմավարության կարևոր բաղադրիչ են նաև հարձակողական անօդաչու թռչող սարքերը, որոնք կարող են կիրառվել մեծ քանակով՝ ծանրաբեռնելով հակաօդային պաշտպանությունը։ Միաժամանակ Իրանը զարգացրել է ստորգետնյա «հրթիռային քաղաքների» համակարգ՝ թաքնված բազաներ և պահեստներ, որոնք թույլ են տալիս պահպանել հարվածային հնարավորությունները նույնիսկ հակառակորդի լայնածավալ հարձակումներից հետո։

Իրանի ռազմական ճնշման մեկ այլ գործիք Պարսից ծոցի և Հորմուզի նեղուցի վերահսկումն է։ Թեհրանը կարող է սպառնալ նավթատար նավերին և ռազմական նավերին հակառազմածովային հրթիռներով, ծովային ականներով, անօդաչու սարքերով և արագ հարձակողական նավակներով։ Նեղուցի շուրջ ցանկացած լարվածություն անմիջապես ազդում է համաշխարհային նավթի և գազի շուկաների վրա։