Սյունիքի մարզպետը հայտարարագրել է միայն աշխատավարձերից գոյացած եկամուտները

Սյունիքի մարզպետը և նրա երկու տեղակալները 2011-ին, պաշտոնապես որևէ անշարժ, շարժական, առավել ևս՝ թանկարժեք գույք ձեռք չեն բերել: Դատելով բարձրաստիճան պաշտոնատար անձանց՝ Էթիկայի հանձնաժողով ներկայացրած գույքի և եկամուտների հայտարարագրերից, նրանք նաև չեն ունեցել արժեթղթեր և այլ ներդրումներ: Ամենահամեստը մարզպետի հայտարարագիրն է. նա, ի տարբերություն իր տեղակալների, նաև դրամական միջոցներ չի ունեցել:

Այսպես՝ Սյունիքի մարզպետ Սուրիկ Խաչատրյանը և նրա տիկինը 2011-ի համար հայտարարագրել են միայն աշխատավարձերից գոյացած եկամուտներ՝ համապատասխանաբար 2 մլն 359 հազար 603 դրամ և 1 մլն 272 հազար դրամ:

Մարզպետի տեղակալ Արա Դոլունցի և նրա տիկնոջ միակ եկամուտը ևս աշխատավարձն է եղել՝ համապատասխանաբար 1 մլն 798 հազար 518 դրամ և 940 հազար դրամ: Ա. Դոլունցը, սակայն, ի տարբերություն իր վերադասի, հայտարարագրել է նաև դրամական միջոցներ՝ 7,5 մլն դրամ, որն, ի դեպ, տարեսկզբին և տարեվերջին մնացել է անփոփոխ:

Սյունիքի մարզպետի մյուս տեղակալի՝ Վաչե Գրիգորյանի, եկամուտները գոյացել են 2 մլն 167 հազար 744 դրամ աշխատավարձից և 425 ԱՄՆ դոլար ավանդից ստացված տոկոսից: Նրա դրամական միջոցները տարեսկզբին եղել են 1,5 մլն դրամ և 5 հազար ԱՄՆ դոլար, տարեվերջին՝ 2 մլն դրամ և 5 հազար 425 ԱՄՆ դոլար: Վ.Գրիգորյանի տիկինը որպես տարեկան եկամուտներ հայտարարագրել է 1,2 մլն դրամ աշխատավարձ: Տիկնոջ դրամական միջոցները տարեսկզբին եղել են 200 հազար դրամ, տարեվերջին՝ 250 հազար դրամ:

«Փաստինֆո»