ԱՄՆ-ը բացատրել է՝ ինչու չի պաշտպանում նավթատար տանկերները Օրմուզի նեղուցում

ԱՄՆ ռազմածովային ուժերը ներկայումս չեն ուղեկցի Օրմուզի նեղուցով անցնող նավթատար տանկերներին։ Այս մասին CNBC-ին տված հարցազրույցում հայտարարել է ԱՄՆ էներգետիկայի նախարար Քրիս Ռայթը։

Նրա խոսքով՝ նման պաշտպանությունը կարող է կազմակերպվել մոտ ապագայում, սակայն այժմ դա հնարավոր չէ, քանի որ ամերիկյան ռազմական ռեսուրսների մեծ մասը կենտրոնացած է Իրանի հարձակողական հնարավորությունների և այդ հնարավորությունները ապահովող արտադրական ենթակառուցվածքների ոչնչացման վրա։

Ռայթը նշել է, որ տանկերների ուղեկցումը, ամենայն հավանականությամբ, կսկսվի մարտի վերջերին։ Միջազգային էներգետիկ գործակալության տվյալներով՝ Օրմուզի նեղուցով նավթի տարանցումը կտրուկ նվազել է, և նավթի շուկան բախվել է մատակարարումների ամենամեծ խափանումներից մեկին պատմության ընթացքում։ Ամենաշատը կարող են տուժել Չինաստանն ու Հնդկաստանը, որոնք մեծապես կախված են Մերձավոր Արևելքից նավթի մատակարարումներից։