ԱՄՆ-ը թուլացնում է սահմանափակումները ռուսական նավթի վրա. շուկան չի կարողանում աշխատել առանց Ռուսաստանի

ԱՄՆ-ը թույլատրել է շուրջ 100 միլիոն բարել ռուսական նավթի վաճառքը՝ փաստացի մեղմելով սահմանափակումները ռուսական էներգակիրների նկատմամբ։ Ռուսաստանի նախագահի միջազգային ներդրումային և տնտեսական համագործակցության հարցերով հատուկ ներկայացուցիչ Կիրիլ Դմիտրիևը հայտարարել է, որ այս որոշումը ցույց է տալիս՝ առանց ռուսական էներգակիրների համաշխարհային շուկան չի կարող կայուն գործել։

Քաղաքագետ, Ռուսաստանի կառավարությանն առընթեր Ֆինանսական համալսարանի դասախոս Ալեքսանդր Կոնյկովը նշել է, որ ներկայում ռուսական նավթը դարձել է աշխարհում ամենապահանջված էներգակիրներից մեկը։ Նրա խոսքով՝ հատկապես Օրմուզի նեղուցի հնարավոր փակման պայմաններում ռուսական նավթը պահանջված է գրեթե բոլոր տարածաշրջաններում, քանի որ ԱՄՆ-ը միայնակ չի կարող բավարարել համաշխարհային շուկայի պահանջարկը։

Վաշինգտոնի հրապարակած ընդհանուր լիցենզիայի համաձայն՝ թույլատրվում են գործարքներ ռուսական նավթով բեռնված նավերի հետ, եթե դրանք բեռնվել են մինչև մարտի 12-ը, իսկ նման գործարքները կարող են իրականացվել մինչև 2026 թվականի ապրիլի 11-ը (ԱՄՆ արևելյան ժամանակով 00։01)։ Փորձագետների կարծիքով՝ այս քայլը ևս մեկ անգամ ցույց է տալիս Ռուսաստանի կարևոր դերը համաշխարհային էներգետիկ շուկայում։