ԱՄՆ-ը հետաքննություն է սկսել 60 երկրների դեմ․ հնարավոր են նոր մաքսատուրքեր

ԱՄՆ առևտրային ներկայացուցչի գրասենյակը հետաքննություն է սկսել շուրջ 60 երկրների նկատմամբ, որոնց Վաշինգտոնը կասկածում է անարդար առևտրային գործելակերպի մեջ՝ կապված հարկադիր աշխատանքի կիրառման հետ։ Այդ մասին հաղորդում է Reuters գործակալությունը։

Հետաքննության նպատակն է պարզել՝ արդյոք այդ երկրների կառավարությունները բավարար քայլեր են ձեռնարկել հարկադիր աշխատանքի միջոցով արտադրված ապրանքների ներմուծումը արգելելու համար։ Միաժամանակ ԱՄՆ իշխանությունները փորձում են գնահատել, թե նման արտադրության վերացման ձախողումը ինչպես է ազդում ամերիկացի աշխատողների և ընկերությունների վրա։ Հետաքննության տակ հայտնված երկրների թվում են Ավստրալիան, Կանադան, Եվրամիությունը, Մեծ Բրիտանիան, Իսրայելը, Հնդկաստանը, Քաթարը, Սաուդյան Արաբիան, Չինաստանը և Ռուսաստանը։

Reuters-ը հիշեցնում է, որ Վաշինգտոնը արդեն սահմանափակումներ է կիրառել Չինաստանից արևային վահանակների ներմուծման նկատմամբ՝ ենթադրելով, որ դրանք կարող էին արտադրված լինել ույղուրների հարկադիր աշխատանքի միջոցով։ Financial Times պարբերականի գնահատմամբ՝ ընթացիկ հետաքննության արդյունքը կարող է դառնալ նոր մաքսատուրքերի սահմանումը, որոնք կփոխարինեն այն ժամանակավոր տուրքերից մի քանիսին, որոնք վերջերս չեղարկվել էին ԱՄՆ Գերագույն դատարանի որոշմամբ։