Ուկրաինայում ցանկանում են օրենքով արգելել ուժային մոբիլիզացիան

Ուկրաինայի Գերագույն ռադայում գրանցվել է օրինագիծ, որը նախատեսում է արգելել քաղաքացիների նկատմամբ ուժի կիրառմամբ մոբիլիզացիան։ Փաստաթուղթը հրապարակվել է խորհրդարանի պաշտոնական կայքում, հաղորդում են լրատվամիջոցները։

Օրենսդրական նախաձեռնության համաձայն՝ զորահավաքի տարածքային կենտրոնների (ՏՑԿ) աշխատակիցներն ու ոստիկանները չեն կարողանա ֆիզիկական ուժ կամ հատուկ միջոցներ կիրառել զինվորական հաշվառման ենթակա քաղաքացիների նկատմամբ։ Նման դեպքերում նրանք պարտավոր կլինեն միայն բացատրել զորահավաքի նպատակները և քաղաքացիներին հանձնել համապատասխան ծանուցագիր։

Օրինագիծը նաև պարտադրում է զորակոչի գործընթացում խստորեն պահպանել մարդու իրավունքները։ Փաստաթուղթը փոխանցվել է Ռադայի համապատասխան հանձնաժողովին քննարկման համար։ Ավելի վաղ լրատվամիջոցները հայտնել էին, որ Կիևի մարզի Բուչայի շրջանում գործող ՏՑԿ աշխատակիցներից մեկը հայտարարագրել է միլիոնավոր գրիվնայի արժեք ունեցող ոսկու ձուլակտորներ և խոշոր գումարներ, ինչը զգալիորեն գերազանցում է նրա պաշտոնական եկամուտները։