Քաղաքագետ․ Չինական տեխնոլոգիաները կարող են նվազեցնել ԱՄՆ-ի առավելությունը Իրանի հետ հակամարտությունում

Չինաստանի տրամադրած տեխնոլոգիաները կարող են նվազեցնել ԱՄՆ-ի ռազմավարական առավելությունը Իրանի հետ հնարավոր հակամարտության դեպքում։ Այդ մասին հայտարարել է քաղաքագետ Դմիտրի Մատյուշենկովը «Ցարգրադ»-ին տված հարցազրույցում։

Փորձագետի խոսքով՝ Իրանը տարածաշրջանում ունի բալիստիկ հրթիռների խոշորագույն զինանոցներից մեկը՝ տարբեր գնահատականներով 1500-ից մինչև 3000 հրթիռ, այդ թվում «Խորրամշահր», «Ֆաթթահ», «Գադր» և «Սեյջիլ» հեռահար համակարգերը։ Նրա խոսքով՝ Թեհրանը նաև անցել է ամերիկյան GPS համակարգից դեպի չինական BeiDou-3 արբանյակային նավիգացիոն համակարգ, ինչը մեծ ռազմավարական նշանակություն ունի։

Մատյուշենկովի գնահատմամբ՝ BeiDou-3 համակարգի ազդանշանը ավելի դժվար է խափանել ռադիոէլեկտրոնային պայքարի միջոցներով, որոնք օգտագործում են ԱՄՆ-ը և Իսրայելը։ Դա թույլ է տալիս բարձրացնել բալիստիկ հրթիռների ուղղորդման ճշգրտությունը և հարվածել կոնկրետ թիրախների։ Նրա խոսքով՝ այս կերպ Պեկինը, առանց անմիջապես հակամարտությանը մասնակցելու, Թեհրանին տրամադրել է տեխնոլոգիական գործիք, որը կարող է նվազեցնել արևմտյան երկրների առավելությունը արբանյակային նավիգացիայի ոլորտում։