Politico․ ԱՄՆ փոխնախագահ Վենսը կասկածանքով էր վերաբերվում Իրանի դեմ հարվածներին

ԱՄՆ փոխնախագահ Ջեյ Դի Վենսը մինչ Իրանի դեմ ռազմական գործողությունների մեկնարկը կասկածանքով էր վերաբերվում նման որոշմանը։ Այդ մասին գրում է Politico-ն՝ հղում անելով Սպիտակ տան աղբյուրներին։

Պարբերականի տվյալներով՝ Վենսը, որը նախկինում բազմիցս քննադատել է ԱՄՆ-ի միջամտությունը այլ երկրների գործերին, հրապարակային կերպով աջակցել է նախագահ Դոնալդ Թրամփի որոշմանը։ Սակայն Սպիտակ տան պաշտոնյաների խոսքով՝ մինչ գործողության մեկնարկը նա արտահայտել էր իր մտահոգությունն ու անհամաձայնությունը հնարավոր ռազմական սցենարի վերաբերյալ։

Աղբյուրներից մեկը նշել է, որ Վենսը մտահոգված էր պատերազմի հետևանքներով և կասկածանքով էր վերաբերվում Իրանի դեմ գործողություններին։ Միևնույն ժամանակ Սպիտակ տան պաշտոնյաները ընդգծել են, որ փոխնախագահի դերը նաև այլընտրանքային տեսակետ ներկայացնելն է, սակայն վերջնական որոշումից հետո նա ամբողջությամբ աջակցում է վարչակազմի քաղաքականությանը։ Ավելի վաղ G7 երկրների առաջնորդները Թրամփին կոչ էին արել հնարավորինս արագ ավարտել Իրանի շուրջ հակամարտությունը՝ մտահոգություն հայտնելով դրա տնտեսական հետևանքների կապակցությամբ։