Գերմանիայի կանցլերը դեմ է ռուսական նավթի նկատմամբ ԱՄՆ սահմանափակումների թուլացմանը

Գերմանիայի կանցլեր Ֆրիդրիխ Մերցը հայտարարել է, որ սխալ կլինի որևէ պատճառաբանությամբ թուլացնել Ռուսաստանի նկատմամբ սահմանված պատժամիջոցները։ Նրա խոսքը փոխանցում է Reuters գործակալությունը։

Մերցը արձագանքել է ԱՄՆ իշխանությունների որոշմանը, որով ժամանակավորապես թույլատրվել է վաճառել ռուսական նավթը, եթե այն տանկերների վրա բեռնվել է մինչև մարտի 12-ը։ Կանցլերի խոսքով՝ Բեռլինում այդ որոշման մասին տեղեկացել են միայն ուրբաթ առավոտյան և այժմ ցանկանում են հասկանալ Վաշինգտոնի քայլի իրական պատճառները։

ԱՄՆ ֆինանսների նախարարության արտասահմանյան ակտիվների վերահսկման վարչության հրապարակած ընդհանուր լիցենզիայի համաձայն՝ ռուսական նավթով բեռնված նավերի հետ գործարքները թույլատրվում են մինչև 2026 թվականի ապրիլի 11-ը (ԱՄՆ արևելյան ժամանակով 00։01)։ Սակայն Մերցը ընդգծել է, որ պատժամիջոցների մեղմացումը կարող է սխալ ազդակ ուղարկել միջազգային հանրությանը։