Վաճառքի է հանվել լեգենդար «Վոլգա»-ն․ 1981 թվականի մոդելը գնահատվել է 13,500 եվրո

Գերմանիայի Նյուրնբերգ քաղաքում վաճառքի է հանվել խորհրդային ավտոարդյունաբերության լեգենդար ներկայացուցիչը՝ 1981 թվականին արտադրված ԳԱԶ-24 «Վոլգա» մակնիշի ավտոմեքենան։ Այս մասին հայտնում է 110km.ru պորտալը՝ նշելով, որ վաճառողը պատրաստ է նաև բանակցել գնի շուրջ անձնական հանդիպման ընթացքում։

Ավտոմեքենան պահպանել է իր օրիգինալ «օխրա» գույնը, սակայն տեխնիկական առումով այն արդիականացվել է։ 2025 թվականի մայիսին մեքենան ստացել է նոր՝ 2.5 լիտր ծավալով բենզինային շարժիչ՝ 95 ձիաուժ հզորությամբ։ Միաժամանակ փոխարինվել են փոխանցման տուփը և կալանքը, իսկ վառելիքի ծախսը կազմում է մոտ 10 լիտր՝ 100 կմ ճանապարհի համար։ Արտաքին տեսքով մեքենան գրեթե չի տարբերվում գործարանային տարբերակից, թեև համալրվել է ժամանակակից համակարգերով՝ թվային մագնիտոլա, յուղի ջերմաստիճանի սենսոր, լայնացված անվադողեր և հետընթաց պարկտրոնիկներ։

Վաճառողը չի հրապարակել մեքենայի անցած ճանապարհը և նախկին սեփականատերերի քանակը, սակայն հայտնի է, որ 2016 թվականից այն գտնվել է մեկ սեփականատիրոջ մոտ։ Գնորդը կստանա ամբողջական փաստաթղթային փաթեթ՝ ներառյալ գործարանային ձեռնարկներ, պահեստամասերի կատալոգ և սպասարկման բոլոր հաշիվները։ Բացի այդ, մեքենան ունի հատուկ H համարանիշ, որը Գերմանիայում տրվում է դասական ավտոմեքենաներին և հեշտացնում է դրանց շահագործումը։