Փորձագետը նշել է «Երկաթե գմբեթի» թույլ կողմերը․ համակարգը չի դիմանում զանգվածային հարձակումներին

Իսրայելի հակահրթիռային պաշտպանության «Երկաթե գմբեթ» համակարգը ունի մի շարք սահմանափակումներ, որոնք կարող են նվազեցնել դրա արդյունավետությունը զանգվածային հարձակումների դեպքում։ Այս մասին հայտնել է ռազմական փորձագետ Վիկտոր Լիտովկինը՝ նրա խոսքերը փոխանցում է aif.ru կայքը։

Փորձագետի խոսքով՝ համակարգը չի կարող միաժամանակ խոցել մեծ քանակությամբ հրթիռներ, եթե դրանց թիվը գերազանցում է նրա հնարավորությունները։ Նա օրինակ է բերել, երբ Իսրայելի ուղղությամբ արձակվել են հազարավոր հրթիռներ, սակայն համակարգը կարողացել է խոցել միայն դրանց մի մասը, իսկ մնացածը հասել են նպատակներին՝ պատճառելով վնասներ։

Բացի այդ, Լիտովկինը նշել է, որ «Երկաթե գմբեթը» նախատեսված է հիմնականում կարճ հեռահարության հրթիռների դեմ պայքարի համար և սահմանափակ արդյունավետություն ունի ավելի մեծ հեռավորությունից արձակված սպառնալիքների դեպքում։ Ավելի վաղ մի շարք արևմտյան փորձագետներ ևս կասկածի տակ էին դրել համակարգի արդյունավետությունը՝ նշելով, որ այն միշտ չէ, որ կարողանում է լիարժեք պաշտպանություն ապահովել։