ԱՄՆ-ում երկնքում պայթել է հսկայական մետեորիտ․ ձայնը լսվել է մի քանի նահանգում

ԱՄՆ Օհայո նահանգի երկնքում պայթել է շուրջ 7 տոննա զանգված ունեցող խոշոր մետեորիտ։ Ինչպես հայտնում է AP News-ը, տիեզերական օբյեկտը շարժվել է մոտ 72 հազար կմ/ժ արագությամբ և քայքայվել մթնոլորտում՝ առաջացնելով հզոր ձայն, որը բնակիչների մի մասը շփոթել է պայթյունի հետ։

Պայծառ կրակե գունդը նկատվել է միանգամից մի քանի նահանգներում՝ Վիսկոնսինից մինչև Մերիլենդ։ Ամերիկյան մետեորային հասարակության տվյալներով՝ այն տեսանելի է եղել նույնիսկ առավոտյան՝ մոտ 09:00-ին, ինչը նման երևույթների համար հազվադեպ է։

NASA-ի տվյալներով՝ օբյեկտի տրամագիծը կազմել է մոտ 1,8 մետր։ Այն հայտնաբերվել է Էրի լճի վրա՝ մոտ 80 կմ բարձրության վրա, անցել է շուրջ 55 կմ և պայթել Օհայոյի հյուսիսային հատվածում։ Պայթման էներգիան համարժեք է եղել մոտ 250 տոննա տրոտիլի, իսկ մասնագետների գնահատմամբ՝ մետեորիտի մեծ մասը այրվել է մթնոլորտում։