ԵՄ–ի հետ համատեղ մի նոր նախաձեռնությամբ ենք հանդես գալու. ԱԳ փոխնախարարը՝ Հայաստան–ԵՄ գագաթնաժողովի մասին

Մայիսի 4-5–ին բացի Եվրոպական քաղաքական համայնքի գագաթաժողովից, Երևանը հյուրընկալելու է նաև Հայաստան-ԵՄ առանձին գագաթաժողովը, որը համանախագահելու են Հայաստանի կողմից վարչապետը, իսկ ԵՄ կողմից Եվրոպական Խորհրդի նախագահ Կոշտան և Եվրոպական հանձնաժողովի նախագահ Ֆոն դեր Լայենը Այս մասին Հանրային հեռուստատեսությանը տված հարցազրույցում նշեց ԱԳ փոխնախարար Վահան Կոստանյանը։

Նա ընդգծեց, որ սա Հայաստան–ԵՄ առաջին գագաթաժողովն է, և հենց  այս ֆորմատում քննարկվելու է Հայաստան–ԵՄն երկկողմ օրակարգը։

Ըստ փոխնախարարի՝ այս գագաթնաժողովում քննարկվելու են վիզաների ազատականացման, ԵՄ կողմից Հայաստանին օժանդակության հարցերը. «Բացի դրանից, հաշվի առնելով տարածաշրջանում վերջին մեկ տարվա զարգացումները, էական քննարկումներ ենք ունենալու հաղորդակցության թեմաների շուրջ, քննարկելու ենք, թե ինչպես կարող ենք խթանել ներդրումները Հայաստանում։  ԵՄ–ի հետ համատեղ, մի նոր նախաձեռնությամբ ենք հանդես գալու, որը թույլ է տալու մի նոր պատուհան բացել ներդրումային քաղաքականության մեջ։ Եվրամիությունը կաջակցի մասնավոր սեկտորին և կխթանի մասնավոր սեկտորի ներդրումները Հայաստանում տարբեր գործիքների միջոցով»։

Վահան Կոստանյանը տեղեկացրեց, որ Եվրոպական քաղաքական համայնքի գագաթաժողովից, ապա նաև Հայաստան–Եմ գագաղթնաժողովներից հետո Երևանում կկազմակերպվի նաև տարեկան «Երևանյան երկխոսություն» դիվանագիտական ֆորումը, որտեղ նաև մի շարք եվրոպացի, այդ թվում բարձրաստիճան պաշտոնյաներ կմնան մասնակցելու ֆորումին։

Բացի այդ, Ֆրանսիայի նախագահ Էմանուել Մակրոնը Հայաստան է այցելում պետական այցով, որի ժամանակ կստորագրվի ռազմավարական գործընկերության փաստաթուղթը։