Զելենսկին հայտարարել է՝ ինչպես է Ուկրաինան գործելու մայիսի 9-ի հրադադարի ընթացքում

Ուկրաինայի նախագահ Վլադիմիր Զելենսկին հայտարարել է, որ Ռուսաստանի կողմից Հաղթանակի օրվա առթիվ հայտարարված հրադադարի ընթացքում Կիևը կգործի «համաչափ սկզբունքով»։ Այդ մասին նա գրել է իր Telegram ալիքում։

Զելենսկու խոսքով՝ եթե Ռուսաստանը շարունակի հարվածները, Ուկրաինան կօգտագործի իր հեռահար հարվածային հնարավորությունները։ Միևնույն ժամանակ նա նշել է, որ եթե Մոսկվան պատրաստ լինի անցնել դիվանագիտական ճանապարհի, ապա Կիևը ևս կընտրի բանակցությունների ուղին։

Ուկրաինայի նախագահը ընդգծել է, որ երկիրը շահագրգռված է պատերազմի ավարտով և պատրաստ է դրա համար իրական քայլեր ձեռնարկել։ Ավելի վաղ նա հայտարարել էր, որ Ուկրաինան մայիսի 8-ին վերջնական որոշում կկայացնի իր գործողությունների վերաբերյալ։ Հիշեցնենք, որ Ռուսաստանի պաշտպանության նախարարությունը մայիսի 4-ին հայտարարել էր մայիսի 8-9-ի հրադադարի մասին, իսկ Կիևը պատասխանել էր, որ «լռության ռեժիմ» կսահմանի ավելի վաղ՝ մայիսի 6-ի կեսգիշերից։