Ալինա Կաբաևան՝ Ռուսաստանի 2-րդ տիկին

Ռուսաստանում շարունակում են տարածվել այն խոսակցությունները, համաձայն որոնց՝ գեղարվեստական մարմնամարզության օլիմպիական չեմպիոնուհի և ՌԴ Պետդումայի պատգամավոր Ալինա Կաբաևան Վլադիմիր Պուտինի սիրուհին է և նրա 2 ապօրինի զավակների մայրը։ Այս մասին գրում է InoPressa-ն`՝ հղում կատարելով Le Figaro-ին։

Իր հերթին՝ ֆրանսիական պարբերականը մեջբերում է The New York Post պարբերականի հոդվածը, որում նշված է, որ Ալինան, ով 2008-ին որդի է ունեցել, նոյեմբեր ամսին գաղտնի կերպով նաև աղջիկ է ծնել: Նա բոլորից թաքցրել է, թե ով է իր 5-ամյա որդու հայրը, իսկ սկզբում անգամ մերժել է ընդունել որդուն և նշել, որ այդ երեխան իր բարեկամներից մեկն է:

«Կաբաևայի դստեր ծննդյան լուրը ստացվել է Լյուդմիլա Պուտինայի՝ հասարակության մեջ վերջին անգամ պաշտոնապես երևալուց 8 ամիս անց, որի հետ Պուտինն ամուսնացած է արդեն 30 տարի։ Լյուդմիլա Պուտինան հայտնվեց անցած տարվա մայիսին Մոսկվայի ընտրական շտաբերից մեկում՝ կապված նախագահական ընտրությունների հետ: Համաձայն տարածված խոսակցությունների՝ Պուտիինն իր կնոջ հետ արդեն երկար տարիներ բաժանված է, և Լյուդմիլան զբաղեցնում է Սոչիում գտնվող նախագահական նստավայրերից մեկը»,-գրում է Le Figaro-ի լրագրող Կաինա Սեկկաին։ 

«Լյուդմիլա Պուտինայի անհետանալը պարարտ հող է ստեղծում ամենաանհավանական ենթադրությունների համար։ Որոշ մարդիկ անգամ նշում են, որ Լյուդմիլային նախագահ ամուսնու թելադրանքով տեղափոխել են հոգեբուժարան»,-գրում է The New York Post-ը։