Շնորհակալ ենք հայ գործընկերներին Ռուսաստանի առաջարկած բանաձևին աջակցելու համար. ՀՀ–ում ՌԴ դեսպան

«Երկրների միջև մշակութային-հումանիտար և համամարդկային կապերը շարունակում են մնալ երկկողմ հարաբերությունների հիմնասյուներից մեկը»,– «Իրավունք» թերթին տված հարցազրույցում ասել է Սերգեյ Կոպիրկինը: 

Նա նշել է` այս առումով կարևոր է նացիզմի դեմ ընդհանուր հաղթանակը, որում մեծ է Հայաստանի ներդրումը։ Դեսպանը ցավով է նշել, որ այսօր նացիզմը կրկին գլուխ է բարձրացնում հատկապես եվրոպական երկրներում:  Այդ կապակցությամբ նա նաև մեկնաբանել է Երևանում կայացած ԵՀՔ գագաթաժողովը և Զելենսկու հայտարարությունները, որոնք ավելի վաղ արդեն դատապարտել էր պաշտոնական Մոսկվան:

Ռուսաստանը ԵՀՔ ձևաչափի մասնակից չէ, այնուամենայնիվ, դատելով բաց աղբյուրների տեղեկություններից, ռուսական թեմատիկային մեծ ուշադրություն է դարձվել, սակայն զուտ առճակատման առումով։ Մոսկվայի ուղղությամբ Զելենսկու ագրեսիվ ռեպլիկները ոչ միայն կոշտ նախազգուշացում են առաջացրել ՌԴ պաշտպանության նախարարության կողմից, այլև տարըմբռնում` հայ հասարակության շրջանում։

Այն հանգամանքը, որ Ռուսաստանին և Բելառուսին ի սկզբանե չեն հրավիրել ԵՀՔ հարթակ, հստակ ցույց է տալիս, որ նախաձեռնողները չեն ձգտում միավորող օրակարգ ձևավորել։ Ի տարբերություն նրանց՝ Մոսկվան և Մինսկը առաջ են քաշել եվրասիական մայրցամաքում կայունության ապահովման բաց ճարտարապետության ձևավորման նախաձեռնություն, որը հիմնված է անվտանգության անբաժանելիության սկզբունքների և եվրասիական պետությունների առաջնահերթ պատասխանատվության ապահովման վրա տարածաշրջանի խնդիրների լուծման համար: