Ապօրինի պահվող զենք-զինամթերքի կամավոր հանձնումներ են տեղի ունեցել

Ապօրինի պահվող զենք-զինամթերքը կամավոր հանձնելու հերթական դեպքն է գրանցվել Համայնքային ոստիկանության Թալինի բաժնի ծառայողների բացատրական աշխատանքի արդյունքում։ Ոստիկանություն զանգած քաղաքացին հայտնել էր, որ զենք-զինամթերք է թողել Երևան-Գյումրի ճանապարհի 70-րդ կմ հատվածում գտնվող սպասասրահի մոտ։ Համայնքային ոստիկանները նշված վայրում հայտնաբերել են երկու հրացան, 5,66 մմ տրամաչափի ատրճանակ՝ պահեստատուփով, սվին-դանակ, ինքնաձիգի 102 փամփուշտ։

 

Զենք-զինամթերք է կամավոր հանձնվել նաև Համայնքային ոստիկանության Արթիկի բաժնի ծառայողների բացատրական աշխատանքի արդյունքում։

Ոստիկանություն զանգած քաղաքացին հայտնել էր, որ զենք-զինամթերք է թողել Արթիկ-Պեմզաշեն ճանապարհին՝ էլեկտրասյան մոտ։ Նշված վայրում Արթիկի համայնքային ոստիկանները հայտնաբերել են ակոսափող մարտական հրազեն, որսորդական հրացան, 2 ատրճանակ, «Ֆ-1» տիպի նռնակ՝ պայթուցիչով, տարբեր տրամաչափի 130 փամփուշտ և այլ զինամթերք։

 

Համայնքային ոստիկանության Ամասիայի ծառայողների բացատրական աշխատանքի արդյունքում էլ մի քաղաքացի ապօրինի պահվող ինքնաձիգ և փամփուշտներ էր թողել Ամասիա-Բանդիվան ճանապարհին՝ կամրջի տակ։

 

Չարենցավանի համայնքային ոստիկանների բացատրական աշխատանքի արդյունքում ոստիկանություն զանգած քաղաքացին հայտնել էր, որ զենք-զինամթերք է թողել Չարենցավանի զբոսայգիներից մեկում։ Համայնքային ոստիկանները զբոսայգու նշված հատվածում հայտնաբերել են «Կալաշնիկովի» ինքնաձիգ, որսորդական հրացան, մեկնարկային ատրճանակ, սվին-դանակ, «Ֆ-1» տիպի նռնակ՝ պայթուցիչով, տարբեր տրամաչափի 202 փամփուշտ։

 

Հիշեցնենք, որ այն դեպքերում, երբ ապօրինի պահվող զենք-զինամթերքը իրավապահներն են հայտնաբերում և առգրավում, քրեական պատասխանատվությունն անխուսափելի է: Ոստիկանությունը հորդորում է հետևել կամավոր հանձնողների օրինակին՝ խուսափելով քրեական պատասխանատվությունից: