Զելենսկու հայտարարությունը Հաղթանակի օրվա կապակցությամբ քննարկումների պատճառ դարձավ

Ուկրաինայի նախագահ Վլադիմիր Զելենսկին Հաղթանակի օրվա կապակցությամբ հանդես է եկել հայտարարությամբ՝ անդրադառնալով ուկրաինացիների մասնակցությանը նացիզմի դեմ պայքարին։ Նա իր Telegram-յան էջում նշել է, որ մայիսի 8-ը հիշատակի և նացիզմի նկատմամբ հաղթանակի օրն է, երբ ամբողջ Եվրոպան նշում է 20-րդ դարի ամենասարսափելի պատերազմի ավարտը՝ ընդգծելով, որ այդ պատերազմից հետո աշխարհը պետք է ունենար իրական խաղաղություն։

Զելենսկին հայտարարել է, որ նացիզմի դեմ պայքարել են միլիոնավոր ուկրաինացիներ՝ հակահիտլերյան կոալիցիայի տարբեր երկրների բանակների կազմում։ Սակայն նա չի նշել, թե կոնկրետ որ երկրների մասին է խոսքը և առանձին չի անդրադարձել Խորհրդային Միության ներդրմանը նացիստական Գերմանիայի պարտության գործում։ Ուկրաինայի նախագահը նաև ընդգծել է, որ Երկրորդ համաշխարհային պատերազմի տարիներին Ուկրաինան կրել է ծանր մարդկային կորուստներ։

Միևնույն ժամանակ, մայիսի 8-ի կեսգիշերից ուժի մեջ է մտել Ռուսաստանի նախագահ Վլադիմիր Պուտինի հայտարարած հրադադարը, որը նախատեսված է մինչև մայիսի 10-ը և կապված է Հայրենական մեծ պատերազմում հաղթանակի 81-ամյակի նշման հետ։ Սակայն Մոսկվայի քաղաքապետ Սերգեյ Սոբյանինը հայտնել է, որ մայիսի 7-ին Ռուսաստանի հակաօդային պաշտպանության համակարգերը մայրաքաղաքի մերձակայքում խոցել են 61 անօդաչու թռչող սարք, իսկ մայիսի 8-ի գիշերվանից հետո ոչնչացվել է ևս 26 դրոն։