ԱՄՆ-ում չեն կարողանում գտնել մահացու վիրուսի հավանական կրողներին

ԱՄՆ Կալիֆոռնիա նահանգի իշխանությունները սկսել են որոնել «MV Hondius» զբոսաշրջային նավի ավելի քան 20 ուղևորների, որոնց հետ հնարավոր է շփում ունեցած լինեն հանտավիրուսով վարակված մարդիկ։ Այս մասին հայտնում է The New York Post պարբերականը՝ հղում անելով իր աղբյուրներին։ Տեղեկությունների համաձայն՝ առաջին մահվան դեպքից գրեթե երկու շաբաթ անց մի շարք ուղևորներ հասցրել են լքել նավը, մինչ մասնագետները կհաստատեին նրանց կոնտակտների շրջանակը։

Նշվում է, որ այն ուղևորների մոտ, որոնց հետ բժիշկներին արդեն հաջողվել է կապ հաստատել, առայժմ հիվանդության ախտանիշներ չեն հայտնաբերվել։ Այնուամենայնիվ, առողջապահական ծառայությունները շարունակում են վերահսկել իրավիճակը և որոնել մնացած ուղևորներին՝ հնարավոր ռիսկերը բացառելու նպատակով։

Ավելի վաղ Առողջապահության համաշխարհային կազմակերպության ղեկավար Թեդրոս Ադհանոմ Գեբրեյեսուսը հայտարարել էր, որ «MV Hondius» նավում արձանագրված հանտավիրուսի տարածումը չի հիշեցնում կորոնավիրուսի պանդեմիայի սկիզբը։ Նրա խոսքով՝ ներկայումս մյուս երկրների համար վտանգի մակարդակը գնահատվում է ցածր։