Ամերիկացի միլիարդատերը ԱՄՆ-ի համար քաղաքական քաոս է կանխատեսել մինչև 2028 թվականը

Ամերիկացի միլիարդատեր և Bridgewater հեջ-ֆոնդի հիմնադիր Ռեյ Դալիոն հայտարարել է, որ Հանրապետական կուսակցությունը կարող է կորցնել մեծամասնությունը Ներկայացուցիչների պալատում արդեն այս աշնանը կայանալիք միջանկյալ ընտրությունների ընթացքում։ Այս մասին նա խոսել է The New York Times-ի փոդքասթի ժամանակ՝ նախազգուշացնելով, որ նման զարգացումը կարող է ԱՄՆ-ում լուրջ քաղաքական և սոցիալական ցնցումների պատճառ դառնալ մինչև 2028 թվականի նախագահական ընտրությունները։

Դալիոյի խոսքով՝ երկրում խորացող բյուջետային դեֆիցիտը, հասարակության ներսում աճող ֆինանսական անհավասարությունն ու քաղաքական բևեռացումը կարող են հանգեցնել երկարատև անկայունության։ Նա նաև զգուշացրել է հնարավոր ֆինանսական ճգնաժամի մասին, որը կսահմանափակի ԱՄՆ-ի ծախսերը թե՛ ռազմական, թե՛ սոցիալական ոլորտներում։ Միլիարդատերը կանխատեսում է տոկոսադրույքների աճ, ինչպես նաև կենտրոնական բանկերի կողմից լրացուցիչ փողի տպագրություն, ինչը, ըստ նրա, կարող է ստեղծել ստագֆլյացիոն իրավիճակ։

Ավելի վաղ քաղաքագետ Մալեկ Դուդակովը ևս հայտարարել էր, որ դեմոկրատների հաղթանակը միջանկյալ ընտրություններում կարող է լուրջ խնդիրներ ստեղծել ԱՄՆ նախագահ Դոնալդ Թրամփի համար։ Փորձագետի գնահատմամբ՝ եթե ընդդիմությանը հաջողվի վերահսկողություն ստանալ Կոնգրեսի երկու պալատներում, Թրամփը կկորցնի իրեն հավատարիմ դատավորների և կառավարության անդամների նշանակման հնարավորությունը, իսկ նրա օրենսդրական նախաձեռնությունները կարող են արգելափակվել։ Դուդակովը նաև չի բացառել, որ 2027 թվականին ԱՄՆ-ում կարող են կրկին սկսվել Թրամփին իմփիչմենթի ենթարկելու փորձեր։