Նյու Յորքում ցանկանում են արգելել ոստիկաններին և ICE-ի աշխատակիցներին դիմակ կրել ծառայության ընթացքում

Նյու Յորք նահանգի իշխանությունները պատրաստվում են օրենք ընդունել, որը կսահմանի արգելք իրավապահ մարմինների աշխատակիցների՝ ծառայության ընթացքում դիմակ կրելու համար։ Այս մասին հայտարարել է նահանգապետ Քեթի Հոքուլը՝ ներկայացնելով 2027 թվականի բյուջեի շուրջ նահանգային օրենսդիրների հետ ձեռք բերված համաձայնությունը, հայտնում է Reuters-ը։

Նախագծի համաձայն՝ Նյու Յորքի իրավապահ մարմիններին արգելվելու է համագործակցել ԱՄՆ ներգաղթի և մաքսային վերահսկողության ծառայության՝ ICE-ի հետ դաշնային ներգաղթային գործողությունների շրջանակում։ Բացի այդ, ICE-ի աշխատակիցներին առանց դատարանի թույլտվության կարգելվի մուտք գործել դպրոցներ, բուժհաստատություններ, բնակարաններ և այլ «զգայուն վայրեր»։ Հոքուլի խոսքով՝ իրավապահների համար դիմակ կրելը կթույլատրվի միայն բացառիկ դեպքերում, օրինակ՝ հատուկ պաշտպանիչ գազային դիմակների օգտագործման անհրաժեշտության դեպքում։

Reuters-ը նշում է, որ նմանատիպ սահմանափակումներ արդեն փորձել են կիրառել նաև Կալիֆոռնիան և Նյու Ջերսին։ Սակայն ԱՄՆ արդարադատության նախարարությունը դատական հայցեր է ներկայացրել այդ նահանգների դեմ, իսկ դաշնային դատարանը փետրվարին չեղարկել էր Կալիֆոռնիայի արգելքը՝ հայտարարելով, որ այն «ապօրինաբար խտրական վերաբերմունք է ցուցաբերում դաշնային աշխատակիցների նկատմամբ»։