Պենտագոնը ցանկանում է արհեստական բանականությամբ որսալ թշնամու դրոնները

ԱՄՆ պաշտպանության նախարարությունը նախատեսում է արհեստական բանականության տեխնոլոգիաներ կիրառել թշնամական անօդաչու սարքերի հայտնաբերման և խոցման համար։ Այս մասին հայտնում է Defense News-ը՝ նշելով, որ Պենտագոնը նոր լուծումներ է փնտրում դրոնների դեմ պայքարի արդյունավետությունը բարձրացնելու նպատակով։

Խոսքը վերաբերում է C-UAS Close-In Kinetic Defeat Enhancement նախագծին, որի շրջանակում նախատեսվում է ստեղծել թիրախների ավտոմատ հայտնաբերման և նշանառության համակարգեր։ Պենտագոնը դիտարկում է արհեստական բանականության և մեքենայական տեսողության հիման վրա աշխատող տեխնոլոգիաներ, որոնք կարող են վտանգները հայտնաբերել և ճանաչել ավելի արագ, քան մարդը։ Նախարարությունը հայտերի ընդունումը շարունակելու է մինչև մայիսի 15-ը։

Ծրագրի առաջին փուլում նախատեսվում է արդիականացնել հեռակառավարվող մարտական մոդուլները, այդ թվում՝ CROWS համակարգերը, որոնք տեղադրվում են զրահամեքենաների վրա։ ԱՄՆ ՊՆ-ն ցանկանում է, որպեսզի այդ համակարգերը կարողանան արդյունավետ պայքարել մինչև 25 կիլոգրամ քաշ ունեցող առաջին և երկրորդ խմբի դրոնների դեմ։ Նշվում է, որ համակարգը պետք է կարողանա ինքնուրույն հայտնաբերել թիրախները ավելի քան 600 մետր հեռավորությունից և խոցել դրանք առնվազն 100 մետր հեռավորության վրա։ Հետագա փուլերում ծրագրվում է ստեղծել նաև շարժական հարթակների և հրաձգային զենքերի համար նախատեսված հակադրոնային նշանառության համակարգեր։