Զելենսկին այցելել է ռազմաճակատի Զապորոժիեի ուղղություն

Ուկրաինայի նախագահ Վլադիմիր Զելենսկին այցելել է ռազմաճակատի Ալեքսանդրովսկի ուղղություն՝ Զապորոժիեի մարզի այն հատվածում, որը գտնվում է Կիևի վերահսկողության տակ։ Այս մասին նա հայտնել է իր Telegram-ալիքում։

Զելենսկու խոսքով՝ այցի ընթացքում լսել է Ուկրաինայի զինված ուժերի գլխավոր հրամանատար Ալեքսանդր Սիրսկու զեկույցը ռազմաճակատում տիրող իրավիճակի վերաբերյալ։ Ուկրաինայի նախագահը հայտարարել է, որ, իր գնահատմամբ, Ռուսաստանը չի նվազեցրել մարտական գործողությունների ինտենսիվությունը՝ չնայած հայտարարված հրադադարին։

Բացի այդ, Զելենսկին նշել է, որ քննարկել է մի շարք ընթացիկ հարցեր, այդ թվում՝ օտարերկրյա քաղաքացիների ծառայությունը ուկրաինական բրիգադներում։ Հիշեցնենք, որ մայիսի 8-ի կեսգիշերից ուժի մեջ է մտել Ռուսաստանի նախագահ Վլադիմիր Պուտինի հայտարարած հրադադարը, որը նախատեսված է մինչև մայիսի 10-ը։ Ռուսաստանի պաշտպանության նախարարությունն ավելի ուշ հայտարարել էր, որ ռուսական բանակը «հայելային պատասխան» կտա հրադադարի բոլոր խախտումներին։