Պենտագոնը հրապարակել է ավելի քան 160 գաղտնի նյութ և տեսանյութ՝ չբացահայտված թռչող օբյեկտների մասին

ԱՄՆ պաշտպանության նախարարությունը սկսել է հրապարակել չբացահայտված թռչող օբյեկտների վերաբերյալ գաղտնի նյութերը։ Փաստաթղթերն ու տեսանյութերը տեղադրվել են Պենտագոնի պաշտոնական կայքում։

Ապագաղտնազերծված արխիվում ներառված են ավելի քան 160 ֆայլեր, որոնք վերաբերում են աշխարհի տարբեր հատվածներում արձանագրված չբացահայտված թռչող օբյեկտներին։ Դրանց թվում կա նաև 2024 թվականին Ճապոնիայի երկնքում ամերիկացի զինվորականների կողմից նկարահանված տեսանյութ, որտեղ երևում է ամերիկյան ֆուտբոլի գնդակի ձև ունեցող անհայտ օբյեկտ։ Այլ նյութերում ներկայացված են Լուսնի շուրջ նկատված խորհրդավոր լույսերը, որոնք ֆիքսվել էին «Ապոլոն-17» առաքելության վայրէջքային մոդուլի տեսախցիկով դեռ 1972 թվականին։

Պենտագոնը նաև հրապարակել է տեսանյութեր Աֆրիկայի երկնքում 2025 թվականին, Հունաստանում՝ 2023-ին նկատված անհայտ թռչող օբյեկտների մասին, ինչպես նաև վերջին 80 տարիների ընթացքում հավաքված բազմաթիվ այլ նյութեր։ ԱՄՆ պաշտպանության նախարար Փիթ Հեգսեթը հայտարարել է, որ այս գաղտնի ֆայլերը երկար տարիներ սնուցել են հանրության հետաքրքրությունն ու ենթադրությունները, և այժմ ժամանակն է, որպեսզի ամերիկացիները դրանք տեսնեն սեփական աչքերով։