Դոնալդ Թրամփը մայիսի 8-ը հայտարարել է ԱՄՆ-ի Հաղթանակի օր Երկրորդ համաշխարհային պատերազմում

ԱՄՆ նախագահ Դոնալդ Թրամփը պաշտոնապես հայտարարել է 2026 թվականի մայիսի 8-ը ԱՄՆ-ի Հաղթանակի օր Երկրորդ համաշխարհային պատերազմում։ Համապատասխան հայտարարությունը հրապարակվել է Սպիտակ տան պաշտոնական կայքում։

Փաստաթղթում նշվում է, որ այդ օրը ԱՄՆ-ը նշում է «Ամերիկայի պատմական հաղթանակը բռնապետության և չարի դեմ Եվրոպայում», որը ձեռք է բերվել ամերիկյան բանակի և դաշնակից ուժերի ջանքերով։ «1945 թվականի մայիսի 8-ին նացիստական Գերմանիայի երկաթյա բռունցքը կործանվեց, և հաղթանակի լուրը տարածվեց ամբողջ աշխարհում՝ դառնալով ազատության պատմության շրջադարձային պահ», — ասվում է հայտարարության մեջ։

Դոնալդ Թրամփը նաև ընդգծել է ամերիկացի զինվորականների հերոսությունն ու պատերազմի ընթացքում ԱՄՆ-ի կրած մեծ կորուստները։ Նրա խոսքով՝ նացիզմի դեմ պայքարում զոհվել է ավելի քան 250 հազար ամերիկացի զինծառայող։ Ավելի վաղ Ռուսաստանի դեսպան Ալեքսանդր Դարչիևը հայտարարել էր, որ Թրամփի վերադարձից հետո ԱՄՆ-ի վերաբերմունքը Հաղթանակի օրվա նկատմամբ զգալիորեն փոխվել է, և Սպիտակ տան ներկայացուցիչները նույնիսկ մասնակցել են Վաշինգտոնում Ռուսաստանի դեսպանատան կազմակերպած միջոցառմանը։