ԱՄՆ-ը Թայվանի ռազմական բյուջեի ձգձգումը անվանել է «զիջում» Չինաստանին

ԱՄՆ Պետդեպարտամենտը հայտարարել է, որ Թայվանի ռազմական ծախսերի հետագա ձգձգումը «զիջում» է Չինաստանին։ Այս մասին հայտնում է Reuters-ը՝ Թայվանի խորհրդարանի կողմից պաշտպանության բյուջեի միայն մի մասի հաստատումից հետո։

Թայվանի նախագահ Լայ Ցինդեն առաջարկել էր լրացուցիչ 40 միլիարդ դոլարի ռազմական բյուջե՝ Չինաստանի աճող ռազմական ճնշմանը դիմակայելու համար։ Սակայն ընդդիմության վերահսկողության տակ գտնվող խորհրդարանը երկար քննարկումներից հետո հաստատել է պահանջվող գումարի միայն երկու երրորդը՝ հիմնականում ամերիկյան սպառազինության գնման համար։ Մի շարք ծրագրեր, այդ թվում՝ տեղական արտադրության դրոնների և հրթիռների նախագծերը, ֆինանսավորում չեն ստացել։

ԱՄՆ Պետդեպարտամենտը նշել է, որ աջակցում է Թայվանի պաշտպանական կարողությունների զարգացմանը և զգուշացրել, որ մնացած ծրագրերի ֆինանսավորման ձգձգումը ձեռնտու է Չինաստանի կոմունիստական կուսակցությանը։ Թայվանի պաշտպանության նախարարությունն էլ հայտարարել է, որ որոշ կարևոր նախագծերի դադարեցումը կարող է լուրջ բացեր ստեղծել երկրի պաշտպանական համակարգում։ Խոսքը, մասնավորապես, վերաբերում է «Strong Bow» հակաբալիստիկ հրթիռային համակարգին և անօդաչու սարքերի ծրագրերին, որոնք կարևոր դեր ունեն Թայվանի նոր պաշտպանական ռազմավարությունում։