ԱՄՆ Դաշնային պահուստային համակարգը զգուշացրել է Իրանի պատերազմի և նավթի թանկացման վտանգների մասին

ԱՄՆ Դաշնային պահուստային համակարգը հայտարարել է, որ Իրանի շուրջ շարունակվող պատերազմն ու նավթի կտրուկ թանկացումը դարձել են համաշխարհային ֆինանսական կայունության գլխավոր սպառնալիքները։ Այս մասին նշվում է ԴՊՀ-ի կիսամյակային ֆինանսական կայունության զեկույցում, հայտնում է Reuters-ը։

Հարցման մասնակիցների շուրջ 75 տոկոսը գլխավոր ռիսկ է համարել աշխարհաքաղաքական լարվածությունը, իսկ 70 տոկոսը՝ Իրանի պատերազմի հետևանքով առաջացած նավթային շոկը։ Զեկույցում նշվում է, որ Մերձավոր Արևելքում երկարատև հակամարտությունը, հատկապես մատակարարման շղթաների խափանման և հումքային պակասի պայմաններում, կարող է արագացնել գնաճը և դանդաղեցնել տնտեսական աճը ԱՄՆ-ում ու աշխարհի մյուս երկրներում։ ԴՊՀ-ն նաև զգուշացրել է, որ էներգակիրների գների կտրուկ տատանումները կարող են լուրջ ճնշում գործադրել ֆինանսական շուկաների վրա։

Reuters-ը գրում է, որ փետրվարի 28-ից՝ Իրանի դեմ ԱՄՆ-Իսրայել ռազմական գործողությունների սկսվելուց հետո, համաշխարհային նավթի գներն աճել են ավելի քան 50 տոկոսով և շարունակում են մնալ բարելի դիմաց 100 դոլարից բարձր։ ԱՄՆ-ում բենզինի գներն արդեն հասել են 2022 թվականի հուլիսից ի վեր ամենաբարձր մակարդակին, իսկ գնաճը կրկին գերազանցել է ԴՊՀ-ի նպատակային 2 տոկոսի շեմը։ Զեկույցում որպես նոր ռիսկեր նշվում են նաև արհեստական բանականության ոլորտում պարտքային ներդրումների աճը և մասնավոր վարկավորման շուկայի խնդիրները։