Reuters․ Թրամփը կարող է պաշտոնանկ անել ԱՄՆ Սննդամթերքի և դեղերի վարչության ղեկավարին

ԱՄՆ նախագահ Դոնալդ Թրամփը կարող է պաշտոնանկ անել ԱՄՆ Սննդամթերքի և դեղերի վարչության (FDA) ղեկավար Մարտի Մաքարիին։ Այս մասին հայտնում է Reuters-ը՝ հղում անելով Սպիտակ տանը մոտ կանգնած աղբյուրներին։

Աղբյուրների փոխանցմամբ՝ Սպիտակ տունը արդեն համաձայնություն է տվել Մաքարիի հնարավոր հեռացման վերաբերյալ ծրագրին, թեև վերջնական որոշումը դեռ կարող է փոխվել։ Reuters-ը նշում է, որ Թրամփը հրապարակայնորեն դեռ չի հայտարարել FDA-ի ղեկավարին փոխարինելու մասին, սակայն վարչակազմում արդեն քննարկվում են հավանական թեկնածուները։ Հնարավոր փոխարինողների թվում նշվում են FDA-ի նախկին ղեկավար Սթիվեն Հանը և առողջապահության նախկին պաշտոնակատար Բրեթ Ժիրուարը։

Մարտի Մաքարին վերջին ամիսներին բախվել էր աճող քննադատության՝ կապված դեղերի հաստատման գործընթացների, աբորտի դեղամիջոցների անվտանգության հարցերի և բուրավետ էլեկտրոնային ծխախոտների քաղաքականության հետ։ Reuters-ի տվյալներով՝ Թրամփը դժգոհ էր հատկապես այն բանից, որ FDA-ն դանդաղ է հաստատում որոշ էլեկտրոնային ծխախոտների վաճառքը։ Միաժամանակ հակաաբորտային կազմակերպությունները ևս պահանջում էին նրա հրաժարականը։ Մաքարիի հնարավոր հեռացումը կարող է խորացնել ղեկավարության ճգնաժամը ԱՄՆ առողջապահական համակարգում, որտեղ վերջին շրջանում արդեն մի շարք բարձրաստիճան պաշտոնյաներ լքել են իրենց պաշտոնները։