Լեհաստանը պատրաստակամություն է հայտնել ընդունել ԱՄՆ զորքերը ՆԱՏՕ-ն ամրապնդելու համար

Լեհաստանը պատրաստ է ընդունել Գերմանիայից դուրս բերված ամերիկացի զինվորներին ՆԱՏՕ-ի արևելյան թևը ամրապնդելու համար։ Այս մասին գրել է Լեհաստանի պաշտպանության նախարար Վլադիսլավ Կոսինյակ-Կամիշը X սոցիալական ցանցում։

«Լեհ-ամերիկյան դաշինքը մեր անվտանգության հիմքն է։ Լեհաստանը պատրաստ է ընդունել լրացուցիչ ամերիկյան զորքեր ՆԱՏՕ-ի արևելյան թևը ամրապնդելու և Եվրոպան ավելի պաշտպանելու համար», - նշել է նա։

Ապրիլի 29-ին ԱՄՆ նախագահ Դոնալդ Թրամփը առաջարկել է կրճատել Գերմանիայում գտնվող ամերիկյան զորքերի թիվը։ Այնուհետև հայտարարվեց, որ մեկ տարվա ընթացքում Գերմանիայից դուրս կբերվի մոտ 5000 ամերիկացի զինվոր։ 2025 թվականի դեկտեմբերի դրությամբ Գերմանիայում գտնվող ԱՄՆ ռազմական բազաներում տեղակայված էր ավելի քան 36000 զինվոր և գրեթե 1500 պահեստազորային։