Սմուզին իսկապե՞ս օգտակար է․ մասնագետները զգուշացնում են նաև վնասների մասին

Սմուզին վաղուց դարձել է առողջ սննդակարգի ամենահայտնի բաղադրիչներից մեկը, սակայն մասնագետները նշում են, որ այն ոչ միայն օգտակար, այլև որոշ դեպքերում վտանգավոր կարող է լինել։ Ինչպես գրում է Gazeta.ru-ն, ճիշտ պատրաստված սմուզին կարող է օրգանիզմին ապահովել բջջանյութով, վիտամիններով, սպիտակուցներով և օգտակար ճարպերով, սակայն չափից շատ օգտագործման դեպքում այն կարող է նպաստել քաշի ավելացմանն ու արյան մեջ շաքարի կտրուկ բարձրացմանը։

Նյութում նշվում է, որ սմուզիների հիմնական առավելությունը բջջանյութի պահպանումն է, քանի որ ի տարբերություն հյութերի՝ դրանք պատրաստվում են ամբողջական մրգերից ու բանջարեղենից։ Սակայն բլենդերով մանրացնելու արդյունքում մրգերի բնական շաքարները շատ արագ են յուրացվում օրգանիզմի կողմից։ Մասնագետները խորհուրդ են տալիս սմուզին դիտարկել ոչ թե որպես ըմպելիք, այլ որպես առանձին սննդային ընդունում։

Նուտրիցիոլոգ Յուլիանա Պլիսկինայի խոսքով՝ ամենաօգտակար տարբերակները բանջարեղենային և սպիտակուցային սմուզիներն են, որոնցում առկա են նաև օգտակար ճարպեր։ Մասնագետները խորհուրդ են տալիս խուսափել չափից շատ մրգերից, օշարակներից և քաղցր հավելումներից, քանի որ դրանք կարող են սմուզին վերածել բարձր կալորիականությամբ «քաղցր կոկտեյլի»։