«Գյուղատնտեսության ոլորտի համագործակցությունը դեռևս անբավարար է». Սերգո Կարապետյան

ՀՀ գյուղատնտեսության նախարար Սերգո Կարապետյանն այսօր ընդունեց Իտալիայի Լացիոյի նահանգի ձեռնարկատերերի միության մի շարք ներկայացուցիչների, որոնք Հայաստանում են Հայաստանի Արդյունաբերողների և գործարարների միության հրավերով: Այցի նպատակը Հայաստանի ներդրումային մթնոլորտին ծանոթանալն է: Նույն նպատակն էր հետապնդում նաև այսօրվա հանդիպումը ՀՀ գյուղատնտեսության նախարարի հետ:

Ողջունելով հյուրերին և համառոտակի ներկայացնելով անկախությունից ի վեր Հայաստանի գյուղատնտեսությունում առկա զարգացումները՝ նախարարը հատկապես կարևորեց ոլորտի ներդրումային գրավչությունը. «Մեր երկու երկրների հարաբերությունները հատկապես վերջին տարիներին դինամիկ զարգացում ունեն: Ցավոք, գյուղատնտեսության ոլորտի համագործակցությունը դեռևս անբավարար է»,- նշեց նախարարը՝ խոստանալով ըստ ամենայնի օժանդակել Հայաստանում ներդրումներ կատարող ցանկացած ձեռնարկատիրոջ, հատկապես, որ այս առումով Հայաստանում ստեղծված պայմանները լավագույնն են այսօր: Իր հերթին իտալական պատվիրակության ղեկավար, Լացիոյի Ձեռնարկատերերի միության նախագահ Վինչեցո Ռեգնինին, շնորհակալություն հայտնելով հանդիպման համար, ներկայացրեց իրենց կազմակերպության՝ «Ֆեդերլացիոյի» արդյունաբերական ներուժը: «Սա մեր առաջին և ճանաչողական այցն է , և մենք շատ տպավորված ենք: Կարծում եմ, համագործակցության առաջին քայլերը պետք է կատարվեն ջերմոցային տնտեսությունների ու թռչնի և խոզի մսի արտադրություններում»,- ասաց նա՝ պատվիրակության անունից խոստանալով հաջորդ հանդիպմանը, որ նախատեսվում է գարնանը, ներկայանալ գործնական ու հիմնավոր առաջարկներով: