Սննդաբանը նշել է՝ ինչպես կարելի է պելմենին դարձնել ավելի օգտակար

Բժիշկ-գաստրոէնտերոլոգ և սննդաբան Էլվիրա Բելևան խորհուրդ է տվել պելմենի պատրաստելիս որոշ փոփոխություններ կատարել՝ ուտեստն ավելի հավասարակշռված դարձնելու համար։

Նրա խոսքով՝ խմորի պատրաստման ժամանակ կարելի է սովորական ալյուրի մի մասը փոխարինել ամբողջահատիկ ալյուրով, որը ցանկալի է կազմի առնվազն մեկ երրորդը։ Խմորը խորհուրդ է տրվում պատրաստել գոլ ջրով՝ ավելացնելով քիչ քանակությամբ աղ և ձիթապտղի յուղ։

Միջուկի համար մասնագետը խորհուրդ է տվել ընտրել ավելի քիչ յուղայնությամբ միս՝ հավի կրծքամիս, հնդկահավ կամ երիտասարդ հորթի միս։ Նա նաև առաջարկել է ավելացնել սոխ, գազար և թարմ կանաչեղեն՝ սննդում բջջանյութի քանակը մեծացնելու համար։

Բելևայի խոսքով՝ պելմենին ցանկալի է խաշել, այլ ոչ թե տապակել կամ ջեռոցում պատրաստել։ Պատրաստի ուտեստը կարելի է մատուցել քիչ յուղայնությամբ թթվասերի կամ յոգուրտի և կանաչեղենի հետ, իսկ որպես հավելում ընտրել թարմ բանջարեղեն կամ թթու կաղամբ։

Սննդաբանը նաև նշել է, որ պելմենին ցանկալի է օգտագործել շաբաթական ոչ ավելի, քան երկու անգամ, իսկ մեկ չափաբաժինը սահմանափակել մոտ 150 գրամով։