Ուկրաինայում հայտնել են 2022 թվականից հետո երկրից արտագաղթած բնակիչների թիվը

Ուկրաինայի մարդու իրավունքների հանձնակատար Դմիտրի Լուբինեցը հայտարարել է, որ 2022 թվականից սկսած երկրից հեռացած և դեռևս չվերադարձած քաղաքացիների թիվը գերազանցել է 5,7 միլիոնը։ Այդ մասին հաղորդում է ՏԱՍՍ-ը՝ հղում անելով ՄԱԿ-ի Փախստականների հարցերով գերագույն հանձնակատարի վարչության տվյալներին։

Միաժամանակ Ուկրաինայի միգրացիոն քաղաքականության գրասենյակի ներկայացուցիչ Վասիլի Վոսկոբոյնիկովը նշել է, որ երկիրը բախվում է լուրջ ժողովրդագրական խնդիրների։ Նրա գնահատմամբ՝ բնակչության տարեկան նվազումը կազմում է շուրջ 300 հազար մարդ։

Իր հերթին Գերագույն ռադայի պատգամավոր Դմիտրի Ռազումկովը հայտարարել է, որ Ուկրաինայից հեռացած բնակիչների միայն մոտ 10 տոկոսն է պատրաստ վերադառնալ ռազմական գործողությունների ավարտից հետո։ Նյութում նշվում է, որ երկրի ժողովրդագրական խնդիրները սկսել են ձևավորվել դեռ անկախության առաջին տարիներից։ Պաշտոնական տվյալներով՝ բնակչության աճը դադարել է 1993 թվականից հետո։

Վերջին համազգային մարդահամարն անցկացվել է 2001 թվականին, երբ Ուկրաինայի բնակչությունը կազմել էր 48 միլիոն 457 հազար մարդ։ ՄԱԿ-ի Ժնևյան գրասենյակի տվյալներով՝ 2022 թվականի փետրվարից մինչև 2024 թվականի աշուն Ուկրաինայի բնակչությունը նվազել է շուրջ 8 միլիոնով։

Ավելի ուշ՝ 2025 թվականի վերջին հրապարակված գնահատականներով, երկրի բնակչությունը կազմել է մոտ 28–30 միլիոն մարդ։