Խաղաղություն չի լինի, քանի դեռ հայ գերիները ազատ չեն արձակվել․ ԱՄՆ կոնգրեսական

ԱՄՆ կոնգրեսական Լորա Ֆրիմենը հայտարարել է, որ արդեն 1000 օր է, ինչ հայ ռազմագերիներն ու քաղաքացիական անձինք պահվում են Ադրբեջանում։ Կոնգրեսականը ընդգծել է՝ նրանք անօրինական կերպով կալանավորված են և ենթարկվում են բռնությունների ու սպառնալիքների։

Ֆրիմենն նշել է, որ աշխարհը չպետք է մոռանա ոչ միայն գերիների, այլև Արցախի այն հայերի մասին, որոնք ստիպված լքել են իրենց տները և հեռացել հայրենիքից։

Նա նշել է, որ անձամբ այցելել է Արցախ և տեսել հին եկեղեցիներն ու մշակութային հուշարձանները։ «Ցավալի է տեսնել, որ այդ մարդիկ վտարվել են, իսկ հայկական մշակութային ժառանգությունը վնասվում և ոչնչացվում է», – ընդգծել է նա։

Կոնգրեսականը նաև քննադատել է Ադրբեջանի կողմից անցկացված այսպես կոչված «դատավարությունները» Արցախի նախկին ղեկավարների և ապօրինաբար պահվող գերիների նկատմամբ՝ դրանք անվանելով անարդար և ցուցադրական։

Ֆրիմենը հայտնել է, որ ԱՄՆ-ում աշխատում է մի շարք նախաձեռնությունների վրա՝

որպեսզի արցախահայերը կարողանան անվտանգ վերադառնալ Արցախ,

որպեսզի Ադրբեջանի նկատմամբ կիրառվեն ավելի խիստ պատժամիջոցներ,

որպեսզի ավելացվի օգնությունը Արցախից տեղահանված մարդկանց,

որպեսզի ավելի շատ մարդիկ տեղեկանան Հայոց ցեղասպանության մասին։

Իր խոսքի վերջում նա ասել է, որ իրական խաղաղություն չի կարող լինել, եթե Ադրբեջանը պատասխանատվության չի ենթարկվում իր գործողությունների համար, եթե չեն հարգվում Հայաստանի իրավունքներն ու ինքնիշխանությունը, և քանի դեռ բոլոր հայ գերիները ազատ չեն արձակվել։