ԱՄՆ-ը պատրաստվում է ստեղծել «ուկրաինական պատերազմի» մոդելավորման ռազմական կենտրոննե

ԱՄՆ բանակը նախատեսում է երկրի տարածքում ստեղծել առնվազն երկու ռազմական ուսումնավարժարան, որտեղ հնարավոր կլինի մոդելավորել Ուկրաինայում ընթացող պատերազմի պայմանները։ Այդ մասին հայտարարել է ԱՄՆ բանակի նախարար Դենիել Դրիսկոլը՝ նշելով, որ նման կենտրոնները կօգնեն զինվորականներին կատարելագործել իրենց հմտությունները՝ անօդաչու սարքերի և դրանց դեմ պայքարի տեխնոլոգիաներ մշակողների հետ համատեղ աշխատելով։

Ռուսաստանի Պետդումայի պաշտպանության հանձնաժողովի անդամ Անդրեյ Կոլեսնիկը, մեկնաբանելով այս նախաձեռնությունը, հայտարարել է, որ դրանում արտառոց որևէ բան չկա։ Նրա խոսքով՝ աշխարհի բոլոր բանակները ուսումնասիրում են տարբեր հակամարտությունների փորձը, վերլուծում մարտական գործողությունների ընթացքը և այդ տվյալներն օգտագործում սեփական մարտավարությունն ու ռազմավարությունը կատարելագործելու համար։

Կոլեսնիկը նշել է, որ նման աշխատանքը սովորական մարտական պատրաստության մաս է կազմում և իրականացվում է նաև Ռուսաստանի զինված ուժերում։ Նա ընդգծել է, որ ցանկացած բանակ պարտավոր է հետևել համաշխարհային հակամարտություններին, գնահատել դրանց առանձնահատկությունները և մշակել համապատասխան հակազդման միջոցներ։ Միևնույն ժամանակ, լրատվամիջոցները հիշեցնում են, որ Դենիել Դրիսկոլը վերջին տարիներին դարձել է ԱՄՆ վարչակազմի ազդեցիկ պաշտոնյաներից մեկը և, ըստ Politico-ի, ներգրավված է եղել նաև Ուկրաինայի շուրջ դիվանագիտական քննարկումներում։