Ուկրաինայի անդամակցությունը ԵՄ-ին նոր տարաձայնություններ է առաջացնում. The Telegraph

Ուկրաինան Եվրամիության համար ավելի բարդ թեկնածու է, քան անդամակցության ձգտող մյուս երկրները։ Այդ մասին գրում է The Daily Telegraph-ը՝ նշելով, որ Կիևի անդամակցության գործընթացը մի շարք լուրջ քաղաքական և տնտեսական հարցեր է առաջացնում եվրոպական կառույցներում։

Պարբերականի գնահատմամբ՝ հիմնական խնդիրներից մեկը Ուկրաինայի վերջնական սահմանների վերաբերյալ անորոշությունն է։ Բացի այդ, երկրի խոշոր գյուղատնտեսական ոլորտը, թեև կարող է կարևոր առավելություն լինել Եվրամիության համար, միաժամանակ կարող է լուրջ ճնշում գործադրել ԵՄ գյուղատնտեսական սուբսիդիաների գործող համակարգի վրա։ Նշվում է նաև, որ շուրջ 39 միլիոն բնակչություն ունեցող Ուկրաինան զգալի ազդեցություն կունենա Եվրամիության որոշումների կայացման գործընթացում, ինչը ոչ բոլոր անդամ պետությունների համար է ընդունելի։

The Daily Telegraph-ի փոխանցմամբ՝ եվրոպացի դիվանագետներից մեկը անընդունելի է համարել Ուկրաինային նախապես ԵՄ անդամի կարգավիճակ տրամադրելու գաղափարը՝ հետագայում բարեփոխումներ իրականացնելու պայմանով։ Նրա խոսքով՝ նման մոտեցումը կխաթարի անդամակցության այն սկզբունքը, որը հիմնված է թեկնածու երկրների ձեռքբերումների և պահանջների կատարման վրա։ Միևնույն ժամանակ, Ուկրաինայի հետպատերազմյան վերականգնման հսկայական ծախսերն ու հնարավոր միգրացիոն հոսքերը ևս շարունակում են մտահոգել եվրոպական մի շարք երկրներին։ Հիշեցնենք, որ ավելի վաղ Հունգարիան արգելափակել էր Ուկրաինայի և Մոլդովայի անդամակցության շուրջ բանակցությունների մեկնարկը՝ դառնալով այդ որոշությանը դեմ արտահայտված միակ ԵՄ անդամ պետությունը։