Օլիմպիական չեմպիոն Բոդե Միլլերին մեղադրում են թմրանյութ պահելու մեջ

ԱՄՆ օլիմպիական չեմպիոն լեռնադահուկորդ Բոդե Միլլերը հայտնվել է իրավապահների ուշադրության կենտրոնում՝ թմրանյութ պահելու մեղադրանքով։ Associated Press-ի փոխանցմամբ՝ մարզիկը ձերբակալվել է հունիսի սկզբին ԱՄՆ-ի Այդահո նահանգում։

Իրավապահների տվյալներով՝ Միլլերի մոտ հայտնաբերվել է 4,1 գրամ հալյուցինոգեն սնկեր պարունակող փաթեթ։ Նրան մեղադրանք է առաջադրվել ինչպես թմրանյութերի, այնպես էլ դրանց օգտագործման համար նախատեսված պարագաների պահպանման համար։ Մարզիկը չի ընդունել մեղադրանքը, սակայն 5 հազար դոլար գրավ վճարելուց հետո ազատ է արձակվել կալանքից։

48-ամյա Բոդե Միլլերը լեռնադահուկային սպորտի ամենահայտնի ներկայացուցիչներից մեկն է։ Նա 2010 թվականի Օլիմպիական խաղերում դարձել է օլիմպիական չեմպիոն սուպերկոմբինացիա մրցաձևում, իսկ 2014 թվականին Սոչիի Օլիմպիական խաղերում նվաճել է բրոնզե մեդալ՝ դառնալով լեռնադահուկային սպորտի օլիմպիական խաղերի պատմության ամենատարեց մրցանակակիրը։ Նրա հաշվին ընդհանուր առմամբ կա մեկ ոսկե, երեք արծաթե և երկու բրոնզե օլիմպիական մեդալ։