Բժիշկը նշել է ցերեկային անընդհատ քնկոտության հիմնական պատճառները

Սոմնոլոգ Մաքսիմ Նովիկովը նշել է, որ օրվա կեսին առաջացող ուժեղ քնկոտության ամենատարածված պատճառներից մեկը չափազանց ծանր և յուղոտ ճաշն է։ Նրա խոսքով՝ առատ սնվելուց հետո օրգանիզմն ավելի մեծ արյան հոսք է ուղղում մարսողական համակարգ, ինչի հետևանքով մարդը սկսում է զգալ հոգնածություն և քնկոտություն։

Մասնագետը նաև ընդգծել է, որ քաղցրավենիքի և արագ ածխաջրերի օգտագործումը սկզբում կարճաժամկետ էներգիա է ապահովում, սակայն դրանից հետո արյան մեջ գլյուկոզայի մակարդակը արագ նվազում է, ինչն առաջացնում է թուլություն, դյուրագրգռություն և քնելու ցանկություն։ Բացի այդ, ցերեկային քնկոտության պատճառ կարող է լինել նաև գիշերային ոչ լիարժեք կամ անորակ քուն, նույնիսկ եթե մարդը քնել է 7–8 ժամ։

Բժշկի խոսքով՝ խնդիրը կարող է պայմանավորված լինել նաև ֆիզիկական ակտիվության պակասով։ Երկար ժամանակ անշարժ նստելու դեպքում դանդաղում է արյան շրջանառությունը, և ուղեղը ստանում է ավելի քիչ ազդակներ ակտիվության համար։ Նովիկովը զգուշացնում է, որ մշտական ցերեկային քնկոտությունը երբեմն կարող է վկայել նաև այնպիսի հիվանդությունների մասին, ինչպիսիք են սակավարյունությունը, հիպոթիրեոզը, դեպրեսիան, քրոնիկական սթրեսը, քնի ապնոէն, ինչպես նաև որոշ վարակիչ և նյարդաբանական հիվանդություններ։