Դատարանը կալանքից ազատել է Զատկի կուլիչից նարգիլե պատրաստած աղջկան

Մոսկվայի քաղաքային դատարանի նախագահությունը կալանքից ազատել է Քսենիա Բելոուսովային, որը դատապարտվել էր Զատկի կուլիչից  նարգիլե պատրաստելու և այդ տեսանյութը սոցիալական ցանցերում հրապարակելու համար։ Այդ մասին հայտնում է ՌԻԱ Նովոստին՝ հղում անելով դատարանի մամուլի ծառայությանը։

Դատարանը մասնակիորեն բավարարել է դատախազության վճռաբեկ բողոքը և Բելոուսովային դատապարտել 200 ժամ պարտադիր հանրօգուտ աշխատանքի՝ հավատացյալների կրոնական զգացմունքները վիրավորելու հոդվածով։ Միաժամանակ չեղարկվել է նախորդ պայմանական դատավճռի ուժը կորցրած ճանաչելու որոշումը, ինչի շնորհիվ նա ազատվել է կալանքից։

Նախկին՝ թմրամիջոցների ապօրինի պահման գործով նշանակված երեք տարվա պայմանական ազատազրկման դատավճիռը մնացել է ուժի մեջ և կկատարվի առանձին։ Գործը լայն արձագանք էր ստացել այն բանից հետո, երբ Բելոուսովան բարերից մեկում Զատկի կուլիչը օգտագործել էր որպես նարգիլեի բաժակ, տեսանյութը հրապարակել համացանցում, իսկ ավելի ուշ դատավճռից հետո ներողություն էր խնդրել Ռուս ուղղափառ եկեղեցուց։ Վերջինս էլ դատարանին դիմել էր՝ խնդրելով մեղմացնել նրա պատիժը։