ՌԴ-ում արձագանքել են Մոսկվայից բխող սպառնալիքի մասին Ռյուտեի հայտարարությանը

Ռուսաստանի Դաշնության Դաշնային խորհրդի միջազգային հարցերով հանձնաժողովի նախագահի առաջին տեղակալ Վլադիմիր Ջաբարովը մեկնաբանել է ՆԱՏՕ-ի գլխավոր քարտուղար Մարկ Ռյուտեի հայտարարությունը, ըստ որի՝ Մոսկվան սպառնալիք է ներկայացնում դաշինքի համար։ Այդ մասին հայտնում է ՏԱՍՍ գործակալությունը։

Ջաբարովի կարծիքով՝ ՆԱՏՕ-ի համար նման հայտարարությունները քաղաքականապես շահավետ են, քանի որ թույլ են տալիս դաշինքին ներկայանալ որպես սպառնալիքի ենթարկվող կողմ և հիմնավորել եվրոպական երկրների ռազմականացման անհրաժեշտությունը։

«Թեկուզ հարյուր անգամ ասենք, որ Ռուսաստանը մտադիր չէ որևէ մեկի վրա հարձակվել, ՆԱՏՕ-ի համար ձեռնտու է իրեն ներկայացնել որպես հնարավոր զոհ, որպեսզի արագացնի եվրոպական երկրների ռազմականացումը և խթանի ԱՄՆ-ի ավելի ակտիվ աջակցությունը եվրոպացի դաշնակիցներին», — հայտարարել է ռուս պատգամավորը։

Ավելի վաղ Կրեմլի մամուլի քարտուղար Դմիտրի Պեսկովը շվեյցարական Weltwoche պարբերականին տված հարցազրույցում հայտարարել էր, որ, Ռուսաստանի դիրքորոշմամբ, երկիրը երբեք չի նախաձեռնի երրորդ համաշխարհային պատերազմը։