Դեդ Հասանի սպանությունը Սոչիում քրեական հեղինակությունների պատերազմի վախ առաջացրեց. Guardian

Մաֆիայի պատերազմի պոռթկման վախը Ռուսաստանում առաջացավ քրեական հեղինակություն Դեդ Հասանի սպանությունից 3 շաբաթ անց, քանի որ քրեական կլանները պայքարի մեջ են մտել Սոչիում նրա ունեցվածքներին տիրանալու համար: Այս մասին նշում է Guardian պարբերականը: 

«Որտեղ կա փող, այնտեղ կա կազմակերպված հանցագործություն»,-այս մասին նշել է Novaya Gazeta թերթի քրեական լրագրող Սերգեյ Կանևը և ավելացրել. «Սոչին Ուսոյանի համար երկրորդ հայրենիք էր»: 

Անվտանգության աղբյուրները նշում են, որ քրեական հեղինակությունների հետաքրքրությունները սկսեցին աճել այս քաղաքում, երբ որոշում ընդունվեց, որ քաղաքում պետք է անցկացվեն օլիմպիական խաղեր: Համաձայն պաշտոնական աղբյուրների՝ ձմեռային օլիմպիական խաղերի համար ծախսվելու է շուրջ 32,3 մլրդ եվրո: Շուրջ 400 երկնաքեր, հյուրանոց և այլ շինություններ են կառուցվել և կառուցվելու քաղաքում: 

Չնայած որ դեռ 1 տարի կա մինչև խաղերի սկսվելը, սակայն հետաքրքրություններն այս քաղաքի նկատմամբ աճում են: Պուտինը երկուշաբթի օրը հայտարարել է, որ մեծ ութնյակի տարեկան հաջորդ հանդիպումը տեղի է ունենալու այստեղ:

Օլիմպիական խաղերի մասին նորություններն իրենց հետ բերեցին նաև մաֆիայի բռնությունների ալիք: Ամենաճանաչված հարձակումը 2010 թվականին Էդուարդ Կակոսյանի վրա հարձակումն էր. վերջինս հայտնի է Կարաս մականունով: Կակոսյանը քաղաքում Ուսոյանի ղեկավար ներկայացուցիչներից էր: 

«Ուսոյանը նահանգապետի պես էր այստեղ, սակայն հանցագործ աշխարհից»,-այս մասին նշել է անվատնգության մարմիններին մոտ գտնվող աղբյուրը: Չնայած որ Դեդ Հասանը քաղաքում ոչ մի սեփականություն չունի, սակայն նա շատ կապեր ուներ տարբեր բիզնեսների հետ: 

Աղբյուները նաև նշում են, որ Սոչիում բոլորը սպասում են, թե ինչ պետք է տեղի ունենա քաղաքում, քանի որ այսքան շատ փողը չի կարող հանգիստ մնալ: 

Դեդ Հասանի սպանությունը վախ առաջացրեց, որ կարող է վերականգնվել 1990-ականների քրեական հեղինակությունների պատերազմը: Ուսոյանի սպանությանը հետևեցին մի շարք ձերբակալություններ և սպանություններ, որոնք հիմնականում կենտրոնացած էին էթնիկ ադրբեջանցի Ռովշան Ջանիևի շուրջը, որն էլ ենթադրվում է պատվիրել էր Դեդ Հասանի սպանությունը: 

Հունվարի 20-ին Սուխումիում սպանվեց Ջանիևի ներկայացուցիչն Աբխազիայում: Մեկ շաբաթ անց Մոսկվայում սպանվեց Ռուֆատ Նասիբովը, ով ավելի հայտնի է իր մականունով Գյանջայի Ռուֆո: 

Ջանիևի ձերբակալությունը կարող է նշան լինել, որ անվտանգության մարմինները փորձում են կանխել Ռուսաստանի քրեական հեղինակությունների կոնֆլիկտը: 

«Ռուսաստանում շատ մարդիկ չեն ցանկանում պատերազմ, սակայն մի կրակոցը կարող է բորբոքել ամեն ինչ»,-այս մասին նշել է Նյու Յորք համալսարանի դասախոս Մարկ Գալիոտին, որը մասնագիտանում է ռուսական մաֆիայի առումով: