Չինաստանը մերժել է ԵՄ մեղադրանքները՝ Ռուսաստանի համար զենք մատակարարելու վերաբերյալ

Չինաստանի պաշտոնյաները մերժել են Եվրախորհրդարանի պատգամավորների մեղադրանքները, թե Պեկինը զենք է մատակարարում Ռուսաստանին և ներգրավված է Ուկրաինայի հակամարտությունում։ Այդ մասին հայտնում է Politico-ն։

Պարբերականի տեղեկություններով՝ հուլիսին Եվրախորհրդարանի արտաքին հարաբերությունների հանձնաժողովի պատվիրակությունը այցելել է Չինաստան, որտեղ հանդիպումներ է ունեցել երկրի արտաքին գործերի նախարար Վան Իի և այլ բարձրաստիճան պաշտոնյաների հետ։ Հանդիպման ընթացքում եվրապատգամավորները կոչ են արել Պեկինին օգտագործել իր ազդեցությունը խաղաղության հաստատման համար, ինչպես նաև բարձրացրել են Ուկրաինայի հակամարտությունում Չինաստանի հնարավոր դերի և Ռուսաստանին երկակի նշանակության ապրանքների մատակարարման հարցերը։

Ի պատասխան՝ չինացի պաշտոնյաները հայտարարել են, որ Չինաստանը հակամարտության կողմ չէ, Ռուսաստանին զենք չի վաճառում, աջակցում է երկխոսությանը և կարծում է, որ Եվրոպան պետք է մասնակցի բանակցային գործընթացին։ Ավելի վաղ Ռուսաստանի փոխարտգործնախարար Անդրեյ Ռուդենկոն նույնպես հայտնել էր, որ Մոսկվան շարունակում է կապի մեջ լինել Պեկինի հետ Ուկրաինայի հակամարտության կարգավորման հարցերով։