Ուկրաինական Rozetka-ի խոշորագույն պահեստը ոչնչացվել է Կիևի մարզին հասցված հարվածների հետևանքով

Ուկրաինական Rozetka առցանց առևտրային հարթակի ամենախոշոր պահեստը ոչնչացվել է Կիևի մարզին գիշերը հասցված հարվածների հետևանքով։ Այդ մասին հայտնել է ընկերության համահիմնադիր Իրինա Չեչետկինան, փոխանցում է «ՌԲԿ-Ուկրաինա»-ն։

Չեչետկինայի խոսքով՝ պահեստը, որը շահագործման էր հանձնվել 2017 թվականին, ընկերության ամենամեծ և ամենաավտոմատացված լոգիստիկ կենտրոնն էր, որտեղ օրական մշակվում էր ավելի քան 100 հազար պատվեր։ Նա նշել է, որ պահեստը ենթակա չէ վերականգնման։

Ավելի վաղ Ռուսաստանի պաշտպանության նախարարությունը հայտարարել էր, որ ռուսական ուժերը հարված են հասցրել Կիևում գտնվող «MLP-Չայկա» լոգիստիկ կենտրոնին, որը, գերատեսչության տվյալներով, օգտագործվել է մեծ և միջին հեռահարության անօդաչու թռչող սարքերի և դրանց բաղադրիչների պահպանման համար։