Ասլանյանը ՔՊ-ին․ «Ութ տարի է իշխանության եք, բայց քաղաքական միտք ու օրակարգ չեմ տեսել»

ԱԺ «Ուժեղ Հայաստան» խմբակցության պատգամավոր Մամիկոն Ասլանյանը խորհրդարանում քննարկվող բարեվարքության նախաձեռնության վերաբերյալ հայտարարեց, որ այն ավելի շուտ վերաբերում է իշխող «Քաղաքացիական պայմանագիր» խմբակցությանը, քան ընդդիմությանը։

Նրա խոսքով՝ իրենք նոր են մուտք գործել Ազգային ժողով և ներկայացնում են կրթված ու դաստիարակված ընտանիքներում մեծացած մարդկանց։

«Մենք դեռ որևէ կռիվ կամ վեճ չենք ունեցել։ Բոլորս էլ դաստիարակված մարդիկ ենք։ Ես էլ այնպիսի իրավիճակներից եմ անցել, որ դժվար թե գամ այստեղ և անմիջապես զբաղվեմ կռիվ-դավով։ Այդ պատճառով կարծում եմ՝ բարեվարքության կոչն ավելի շատ ձեզ է վերաբերում»,- ասաց Վանաձորի նախկին քաղաքապետը։

Ասլանյանը նշեց, որ վերջին տարիներին որոշակի քաղաքական փորձ է ձեռք բերել և ակնկալել է, որ խորհրդարանական ամբիոնը պետք է ծառայի քաղաքական գաղափարների ու ծրագրերի քննարկմանը։ Սակայն, նրա գնահատմամբ, իշխանության ութամյա կառավարման ընթացքում հստակ քաղաքական օրակարգ չի ձևավորվել։

Պատգամավորը նաև քննադատեց իշխանության ներկայացուցիչներին՝ նշելով, որ քաղաքական բանավեճը հաճախ սահմանափակվում է փոխադարձ մեղադրանքներով՝ ընտրակաշառքների կամ նախկին տարիների թալանի վերաբերյալ։

Անդրադառնալով երկրի առջև ծառացած խնդիրներին՝ նա ընդգծեց, որ տարածաշրջանում առկա լարվածության պայմաններում անհրաժեշտ է ավելի մեծ ուշադրություն դարձնել արտաքին քաղաքականությանը և տնտեսությանը, մասնավորապես՝ գյուղատնտեսության ոլորտում կուտակված խնդիրներին։

Շարունակելով բարեվարքության թեման՝ Ասլանյանը հայտարարեց, որ խորհրդարանական վարքականոնի խախտումների ամենամեծ պատասխանատվությունը, իր կարծիքով, կրում է վարչապետ Նիկոլ Փաշինյանը, և այդ առաջարկներն առաջին հերթին պետք է ուղղվեն նրան։

Ելույթի ավարտին ընդդիմադիր պատգամավորը նշեց, որ իրենց քաղաքական նպատակը գործող իշխանության փոփոխությունն է՝ հավելելով, որ այդ նպատակին ձգտելու են քաղաքական և քաղաքակիրթ մեթոդներով։

«Մեր նպատակը ձեզ իշխանությունից հեռացնելն է, և մենք կփորձենք դա անել բարեկրթության մթնոլորտում»,- եզրափակեց նա։