«Մուլտի Վելնես»-ը դատի է տվել Երևանի քաղաքապետարանին՝ վիճարկելով կառուցապատման իրավունքի դադարեցումը

«Մուլտի Վելնես» ընկերությունը դատական կարգով վիճարկում է Երևանի քաղաքապետարանի որոշումը, որով դադարեցվել էր ընկերության կառուցապատման իրավունքը, իսկ տարածքը գրանցվել էր որպես համայնքային սեփականություն։

Ըստ «Դատալեքս» տեղեկատվական համակարգի՝ ընկերության ներկայացուցիչը դատարանից պահանջում է անվավեր ճանաչել Երևանի քաղաքապետի հունիսի 8-ի որոշումը, որով միակողմանի դադարեցվել էր Գագիկ Ծառուկյանի հետ կնքված պայմանագիրը։

Դատարանին ներկայացված պահանջներից մեկն էլ Կադաստրի որոշման անվավեր ճանաչումն է, որով հուլիսի 14-ին դադարեցվել էր «Մուլտի Վելնեսի» կառուցապատման իրավունքը, իսկ գույքը գրանցվել էր Երևանի համայնքի սեփականություն։

Հիշեցնենք՝ Երևանի քաղաքապետարանը ավելի վաղ խզել էր «Մուլտի Վելնես»-ի վարձակալության պայմանագիրը։ Քաղաքապետ Տիգրան Ավինյանը հայտարարել էր, որ համալիրն այժմ վերաբացվել է նոր անունով և գործելու է քաղաքային իշխանությունների վերահսկողության ներքո։

Միևնույն ժամանակ, ընկերությունը պնդում է, որ 2016 թվականի պայմանագրով տարածքը վարձակալել էր մինչև 2065 թվականը՝ կառուցապատման իրավունքով։ Գործը մակագրվել է դատավոր Արշակ Պետրոսյանին, իսկ նիստի օրը դեռ հայտնի չէ։