Դատախազության հայցով պետությանը վերադարձված գույքն ամրացվել է Պետական գույքի կառավարման կոմիտեին

Կառավարության նիստում որոշում է կայացվել Տարածքային կառավարման և ենթակառուցվածքների նախարարության պետական գույքի կառավարման կոմիտեին ամրացնել Երևան քաղաքի Կենտրոն վարչական շրջանի Աղայան փողոցի 7-րդ շենքում գտնվող՝ պետությանը վերադարձված նկուղային տարածքն ու հողամասը։

Գլխավոր դատախազ Աննա Վարդապետյանը տեղեկացրել է, որ գույքը վերադարձվել է պետական շահերի պաշտպանության հայցի շրջանակում։ Գլխավոր դատախազության Պետական շահերի պաշտպանության վարչությունը 2026 թվականի հունվարին Հակակոռուպցիոն դատարան էր դիմել՝ պահանջելով անվավեր ճանաչել 2008 թվականին կնքված անշարժ գույքի առուվաճառքի պայմանագիրը և կիրառել դրա անվավերության հետևանքները։

Գործի քննության ընթացքում կողմերը կնքել են հաշտության համաձայնություն, որը դատարանը հաստատել է 2026 թվականի ապրիլի 14-ին։ Դրա հիման վրա հունիսի 6-ին Հայաստանի Հանրապետության սեփականության իրավունքը գրանցվել է Աղայան փողոցի 7-րդ շենքի 51,9 քմ մակերեսով նկուղային տարածքի և 0,08 հա մակերեսով հողամասի նկատմամբ։

Կառավարության ընդունած որոշմամբ վերադարձված գույքն ամրացվել է ՏԿԵՆ պետական գույքի կառավարման կոմիտեին։